Hinn þrautreyndi leikmaður Hauka, Stefán Rafn Sigurmannsson, getur átt von á meira en eins leiks keppnisbanni vegna þess að hann fékk tvær útilokanir með skýrslu eftir leik Hauka og Gróttu í Olísdeild karla á síðasta fimmtudag. Þetta kemur fram í úrskurði aganefndar HSÍ frá því gær.
Aganefnd telur brot leikmannsins, Stefáns Rafns, mögulega verðskulda lengra bann en einn leik og frestaði málinu um sólarhring. Niðurstöðu er að vænta síðar í dag eftir að aganefnd hefur komið saman til aukafundar.
Svipaða sögu er að segja um Hinrik Huga Heiðarsson, ÍBV. Hann hlaut útilokun með skýrslu vegna grófs leikbrots í leik ÍBV og HK í 3.flokki karla þann 26. mars. Aganefnd telur brot hans hugsanlega verðskulda meira en eins leiks bann. Ákvörðun var frestað um sólarhring og má vænta niðurstöðu í dag ef að líkum lætur.
Uppfært: Eftir því sem handbolti.is kemst næst er ekki að vænta úrskurðar fyrr en á morgun frá aganefnd vegna mála Stefáns Rafns og Hinriks Huga.
Víkingur Traustason leikmaður HK fékk einnig útilokun með skýrslu í áðurnefndum leik ÍBV og HK í 3. flokki karla. Brot hans er metið sem svo að það falli undir reglu 8:5 b). Þar með var það niðurstaða aganefndar að ekki skuli aðhafst frekar í málinu. Athygli Víkings er vakin á stighækkandi áhrifum útilokana.
Kristján Orri Jóhannsson leikmaður Víkingur hlaut útilokun með skýrslu vegna grófs leikbrots í leik Víkings og Hauka U í Grill 66 deild karla 24. mars. Kristján Orri sleppur við bann en aganefnd vekur athygli hans á stighækkandi áhrifum útlokana.
