Alfreð Gíslason, landsliðsliðsþjálfari Þýskalands í karlaflokki, hefur orðið, eins og fleiri landsliðsliðsþjálfarar, að gera breytingar á landsliðshópi sínum. Markvörðurinn, Andreas Wolff, og skytturnar Philipp Weber og Steffen Weinhold þurftu að draga sig út úr landsliðshópnum sem mætir Bosníu í undankeppni EM í Düsseldorf á miðvikudagskvöld. Sá síðarnefndi hefur ekki jafnað sig eftir höfuðhögg sem hann fékk í kappleik fyrir ríflega viku.
Í þeirra stað kallaði Alfreð í Paul Drux, leikmann Füchse Berlin, og markvörðinn Till Klimpke hjá Wetzlar. Báðir voru þeir í svokölluðum biðhópi en þegar Alfreð valdi um 20 leikmenn til æfinga á dögunum var hann einnig með nöfn nokkurra leikmenn á lista yfir þá sem næst yrði kallað á ef til þess kæmi að einhverjir heltust úr lestinni.
Þýska landsliðið kom saman til æfinga í Düsseldorf í morgun. Framundan eru tveir leikir í undankeppni EM, þeir fyrstu hjá þýska landsliðinu undir stjórn Alfreðs. Fyrri viðureignin verður á móti Bosníu á fimmtudaginn og sú síðari við Eistland á sunnudag í Tallinn.
