Guðmundur B. Ólafsson, formaður Handknattleikssambands Íslands, verður einn í kjöri til formanns sambandsins á þingi þess á mánudaginn. Hann verður þar með sjálfkjörinn til næstu tveggja ára. Guðmundur hefur verið formaður HSÍ frá 2013.
Umboð fjögurra annarra stjórnarmanna rennur út á þinginu og gefa þrír þeirra kosta á sér til endurkjörs. Það eru Davíð B. Gíslason varaformaður, Jón Viðar Stefánsson formaður markaðsnefndar og Páll Þórólfsson formaður landsliðsnefndar karla.
Magnús Karl Daníelsson formaður fræðslunefndar gefur ekki kost á sér til endurkjörs. Í hans stað verður kosið á milli Daða Hafþórssonar og Ingu Lilju Lárusdóttur sem sækjast eftir að taka við formennsku í fræðslunefnd.
Þrír eru í kjöri til varastjórnar, Alfreð Örn Finsson, Hrafnhildur Ósk Skúladóttir og Inga Lilja Lárusdóttir. Varamenn eru kjörnir til eins árs í senn en aðalmenn til tveggja ára. Alfreð Örn og Inga Lilja hafa setið í varastjórn síðasta starfsár ásamt Daða Hafþórssyni.
Arnar Þorkelson gjaldkeri, Guðríður Guðjónsdóttir formaður landsliðsnefndar kvenna, Kristín Þórðardóttir formaður mótanefndar og Reynir Stefánsson formaður dómaranefndar voru kjörin til tveggja ára á þingi HSÍ á síðasta ári.
Níu sitja í stjórn Handknattleikssambands Íslands auk þriggja varamanna.
