Alexander einróma valinn íþróttamaður Vals

Handknattleiksmaðurinn Alexander Örn Júlíusson er íþróttamaður Vals árið 2021. Greint var frá valinu í hádeginu í dag.

Alexander Örn er fyrirliði Íslands- og bikarmeistara Vals í handknattleik. Í tilkynningu Vals segir að allir sjö nefndarmenn sem stóðu að valinu af hálfu félagsins hafi verið á einu máli að Alexander Örn hreppti hnossið að þessu sinni.

Ennfremur voru veittar viðurkenningar fyrir efnilegasta íþróttafólk félagsins í öllum greinum, karla og kvenna. Handknattleiksdeildin valdi Einar Þorstein Ólafsson efnilegasta handknattleiksmanninn og Elínu Rósu Magnúsdóttur í kvennaflokki.

Þá veittu deildirnar þrjár viðurkenningar fyrir sjálfboðaliða ársins 2021. Gísli Níelsson fékk viðurkenningu frá handknattleiksdeild Vals.