Bikarmeistarar Vals í handknattleik karla mæta Gróttu í 16-liða úrslitum Poweradebikarsins en til stendur að leikir 16-liða úrslita fari fram sunnudaginn 17. nóvember. Valur fær heimaleik gegn Gróttumönnum sem hafa farið mikinn í upphafi leiktíðar í Olísdeildinni.
Dregið var í 16-liða úrslit rétt eftir hádegið í dag í höfuðstöðvum Handknattleikssambands Íslands. Fleiri spennandi leikir standa fyrir dyrum, m.a. viðureign Hauka og ÍBV en ævinlega mætast stálin stinn í viðureignum þeirra félaga.
Eftirtalin lið mætast í 16-liða úrslitum:
Hvíti riddarinn eða Víkingur – Fram.
Haukar – ÍBV.
HK – Afturelding.
Valur – Grótta.
ÍBV2 eða Þór – ÍR.
ÍH eða Selfoss – FH.
Víðir eða Hörður – KA.
Stjarnan – Fjölnir.
Fyrstu umferð ekki lokið
Fjórar viðureignir í fyrstu umferð eru enn óleiknar en vonir standa til að þær verði til lyktar leiddar fyrir 1. nóvember. Þar af leiðandi er ekki alveg ljóst hvaða lið mæta Fram, ÍR, FH eða KA eins og kemur fram hér fyrir ofan.
