Ómar Ingi og Gísli Þorgeir leika til úrslita

Ómar Ingi Magnússon og Gísli Þorgeir Kristjánsson leika til úrslita í Evrópudeildinni í handknattleik á morgun með þýska liðinu SC Magdeburg í Evrópudeildinni eftir að hafa unnið RK Nexe frá Króatíu í undanúrslitaleik, 34:29, en úrslitaleikir keppninnar fara fram í Lissabon.

Magdeburg mætir Benfica í úrslitaleik. Benfica lagði Wisla Plock með sjö marka mun, 26:19, í hinni viðureign undanúrslita.

Ómar Ingi Magnússon skoraði fimm mörk í undanúrslitaleiknum í dag og Gísli Þorgeir Kristjánsson tvö. Magdeburg var með undirtökin í leiknum frá upphafi til enda. Staðan í hálfleik var 18:13.

Magdeburg vann keppnina á síðasta ári og hefur þar með titil að verja í úrslitaleiknum á morgun.