Færeyska landsliðið í handknattleik karla vann sögulegan sigur í kvöld í undankeppni Evrópumótsins þegar það lagði landslið Tékka, 27:26, í æsilega spennandi leik í Höllinni á Hálsi í Þórshöfn. Þetta er í fyrsta sinn sem færeyska landsliðið vinnur leik í riðlakeppni Evrópumótsins en áður hefur það oft unnið leiki í forkeppni mótsins, fyrsta stigi keppninnar.
Eins og gefur að skilja var gleðin við völd í leikslok hjá frændum okkar í Færeyjum þegar flautað var til leiksloka í Höllinni á Hálsi eftir spennandi lokamínútur en um stórsigur er að ræða fyrir færeyskan handknattleik sem hefur verið í mikilli sókn.
Færeyska liðið var tveimur mörkum yfir skömmu fyrir leikslok, 27:25, áður en Tékkum tókst að skora 26. markið. Lengra komust þeir ekki. Tékkar voru marki yfir í hálfleik.
Nicholas Satchwell markvörður KA og færeyska landsliðsins varði vítakast á lokamínútunum.
Hinn efnilegi handknattleiksmaður, Elias Ellefsen á Skipagötu og Sjúrður Olsen voru markahæstir með fimm mörk hvor. Sá síðarnefndi kom færeyska liðinu yfir, 25:24, seint í leiknum í kjölfar þess að Satchwell varði vítakastið. Var það í fyrsta sinn frá því snemma leiks sem Færeyingar komust yfir. Myndskeið af markinu er hér fyrir neðan.
