Ívar Benediktsson skrifar frá München, [email protected]
„Það var vitað að ferðalagið til Georgíu yrði langt og strangt. Ég er alveg pollrólegur vegna þess,“ sagði Snorri Steinn Guðjónsson landsliðsþjálfari karla í handknattleik í samtali við handbolta.is eftir að landsliðið millilenti í München upp úr hádeginu í dag. Tíu tíma bið í höfðborg Bæjara áður en haldið verið á tíunda tímanum í kvöld áfram til Tíblisi í Georgíu. Komið verður til Georgíu eftir miðja aðfaranótt laugardags en fjögurra tíma munur er á Íslandi og Georgíu.
Viðureign Íslands og Georgíu fer fram á sunnudaginn klukkan 14, 18 að staðartíma. Um er að ræða aðra viðureign í undankeppni EM2026. Sú fyrsta var gegn Bosníu á miðvikudagskvöld í Laugardalshöll.
Að lokinni máltíð fengu liðsmenn landsliðsins inni á hóteli við flugvöllinn í München í dag til að ná kríu áður en farið verður af stað um tíu leytið í kvöld.
Undankeppni EM karla “26: úrslit leikja
Áherslur breytast ekki
„Svona er þetta bara. Ég get ekkert í þessu gert, við erum ekkert að stressa okkur á þessu. Við nýtum tímann eins vel og við getum. Við höfum farið vel yfir okkar mál. Þess utan þá breytast ekki allar áherslur þótt Gísli Þorgeir Kristjánsson geti ekki leikið með okkur ytra. Allir vita hvað hann stendur fyrir á vellinum. Ásýndin á leikvellinum verður önnur en við kollvörpum engu, hvorki vegna hans né ferðarinnar. Planið fyrir hana hefur legið fyrir lengi,“ sagði Snorri Steinn ennfremur.
Tökum góða æfingu
„Við tökum góða æfingu í Tíblisi á morgun og búum okkur eins vel undir leikinn og kostur er,“ sagði Snorri Steinn Guðjónsson landsliðsþjálfari í samtali við handbolta.is í dag.
Leikur Íslands og Georgíu fer fram á sunnudaginn í Tíblisi og hefst klukkan 14, 18 að staðartíma í georgísku höfuðborginni.
A-landslið karla – fréttasíða.
