- Dagur Gautason skoraði sjö mörk og var næst markahæstur hjá ØIF Arendal í fimm marka sigri á Runar Sandefjord, 35:30, í norsku úrvalsdeildinni í handknattleik karla í gær. Leikurinn fór fram í Sanderfjord. ØIF Arendal er í þriðja sæti deildarinnar.
- Drammen er næst á eftir í fjórða sæti eftir jafntefli við Nærbø í Drammenshallen, 31:31, í norsku úrvalsdeildinni í handknattleik karla í gær en leikið var í Drammenshallen. Róbert Sigurðarson skoraði ekki mark í leiknum en var aðsópsmikill í vörninni. Viktor Petersen Norberg skoraði fimm mörk.
- Sigvaldi Björn Guðjónsson var ekki á meðal þeirra sem skoruðu mark fyrir Kolstad í öruggum átta marka sigri á útivelli gegn Halden, 30:22, í norsku úrvalsdeildinni í handknattleik í gær. Simen Lyse skoraði 12 mörk fyrir Kolstad en hann er einn af upprennandi handknattleiksmönnum í Noregi. Kolstad er efst í deildinni með 31 stig í 17 leikjum, þremur stigum á undan Elverum sem vann stórsigur á Bækkelaget, 37:26.
- Guðmundur Þórður Guðmundsson og liðsmenn hans í Fredericia HK halda áfram að sækja að Aalborg í toppbaráttu dönsku úrvalsdeildarinnar í handknattleik. Fredericia HK vann Sønderjyske, 26:23, á heimavelli í gær. Einar Þorsteinn Ólafsson tók þátt í varnarleik Fredericia HK og var einu sinni vikið af leikvelli. Fredericia HK er í öðru sæti deildarinnar með 30 stig eftir 19 leiki, er þremur stigum á eftir Aalborg.
- Stöðuna í dönsku úrvalsdeildinni og í fleiri deildum evrópsks handknattleiks er að finna hér.
- Óðinn Þór Ríkharðsson skoraði ekki mark í leik Kadetten Schaffhausen og TSV St. Otmar St. Gallen í svissnesku A-deildinni í gær. Kadetten vann leikinn, 37:30, og er áfram í traustri stöðu í efsta sæti deildarinnar.
- Harpa Rut Jónsdóttir skoraði eitt mark og var einu sinni vikið af leikvelli í tvær mínútur þegar lið hennar, GC Amicitia Zürich, tapaði fyrir Yellow Winterthur, 31:28, í Winterthur í gær í viðureign liðanna í átta liða úrslitum svissnesku bikarkeppninnar. Leikurinn fór fram í Winterthur.
- Fredrikstad Bkl. vann Oppsal, 32:29, í úrvalsdeild kvenna í handknattleik í Noregi í gær. Elías Már Halldórsson er á sínu þriðja keppnistímabili sem þjálfari liðsins sem er í 5. sæti með 23 stig eftir 17 leiki. Larvik er næst á undan með 24 stig en hefur leikið tveimur leikjum fleira en Fredrikstad. Sola er í þriðja sæti með 24 stig eftir 17 leiki. Vipers og Storhamar eru í tveimur efstu sætunum og með nokkra sérstöðu sem fyrr.
- Storhamar, sem Axel Stefánsson er annar þjálfara hjá, vann króatísku meistarana Podravka Vegeta, 31:22, í fjórðu umferð A-riðils Evrópudeildar kvenna í handknattleik í gær. Storhamar tyllti sér þar með í efsta sæti A-riðils með sex stig eftir fjórar umferðir. Podravka er í öðru sæti. Tvær umferðir eru eftir af riðlakeppninni.
- Dunarea Braila, sem vann Val í undankeppni riðlakeppni Evrópudeildar kvenna í handknattleik í haust, er í öðru sæti í B-riðli með sex stig eftir fjóra leiki.