„Ég gerði mér grein fyrir því þegar ég tók við þjálfun liðsins að breytingar stæðu fyrir dyrum. Nokkrir reynslumiklir og góðir leikmenn hættu hjá okkur. Ég tel samt að þegar við verðum búin að fá alla þá leikmenn við viljum tefla fram sækjum við í okkur veðrið,“ segir Patrekur Jóhannesson þjálfari kvennaliðs Stjörnunnar í samtali við handbolti.is.
Fyrsti leikur í kvöld
Stjarnan mætir Fram í fyrstu umferð Olísdeildar kvenna í Lambhagahöllinni í Úlfarsárdal í kvöld klukkan 19.30. Eftir stórt tap fyrir Val í Meistarakeppni HSÍ á síðasta laugardag má draga þá ályktun að Stjarnan eigi á brattann að sækja framan af tímabilinu.
Patrekur segir að auk þess sem leikmenn eins og Helena Rut Örvarsdóttir verði ekki með í vetur þá hafi Embla Steindórsdóttir ekki æft með síðustu vikur vegna veikinda. Fleiri hafi verið fjarverandi af öðrum ástæðum síðustu vikur s.s. eins og Tinna Sigurrós Traustadóttir og Guðmunda Auður Guðjónsdóttir. Þess vegna má ekki draga of miklar ályktanir af einum leik þegar horft er til tímabilsins en Stjörnunni var spáð sjötta sæti af átta í Olísdeildinni í spá þjálfara og fyrirliða.
„Við verðum sterkari þegar inn á tímabilið verður komið og fleiri leikmenn verða komnir í hópinn. En það liggur fyrir að ég verð eitthvað að styrkja hópinn til viðbótar. Ég er að líta í kringum mig með liðsauka í erlendum markverði,“ segir Patrekur sem undirstrikar að horft sé til lengri tíma við uppbyggingu kvennaliðsins innan Stjörnunnar.
Lengra myndskeiðsviðtal er við Patrek efst í þessari frétt.
Sjá einnig: Leikjadagskrá Olísdeilda.
Konur – helstu félagaskipti 2024
Verðum klár í slaginn við Hauka
