„Ég man ekki eftir því að hafa varið fjögur vítaköst í leik. Þetta var rosalegt,“ sagði Elín Jóna Þorsteinsdóttir markvörður við handbolta.is í kvöld eftir að hún átti stórleik og varði m.a. fjögur vítaköst í leik við Ólympíumeistara Frakka á heimsmeistaramótinun í handknattleik í Stafangri í kvöld. Hún var valin maður leiksins og var með 34% hlutfallsmarkvörslu þegar leiknum lauk með 9 marka sigri Frakka, 31:22, sem voru 10 mörkum yfir í hálfleik, 20:10.
„Þetta var geggjuð upplifun. Ég veit ekki hvernig ég á að útskýra hvað gerðist,“ sagði Elín Jóna og svo virtist sem frammistaðan kæmi henni sjálfri mest á óvart en flest skotanna sem hún varði fyrir utan vítaköstin voru í opnu færum því mörg færi Frakka komu eftir hraðaupphlaup eða þegar íslenska vörnin opnaðist illilega.
Við unnum seinni hálfleik!
„Framan af fyrri hálfleik vorum við í mestu vandræðum en tókst að vinna okkur inn í leikinn. Við létum aldrei hug falla. Ég er stolt af sjálfri mér og liðinu. Mér fannst margt flott hjá okkur þrátt fyrir tapið. Þegar hlutirnir ganga ekki upp hjá okkur þá hugsum við bara um næstu sókn, næstu vörn, alveg sama hver staðan er. Það skein alveg í gegn í dag í stað þess að hengja haus og gefast upp af því að munurinn er orðinn svo og svo mikill. Við unnum seinni hálfleikinn,“ sagði Elín Jóna Þorsteinsdóttir markvörður í samtali við handbolta.is.
Ekki nóg að vera í jöfnum leikjum í seinni hálfleik
Afleitur upphafskafli gaf Frökkum átta marka forskot – Elín Jóna átti stórleik
