Hlaupið hefur á snærið hjá bikar- og deildarmeisturum ÍBV en samningur hefur náðst við hægrihandar skyttuna Britney Cots um að leika með liði félagsins á næstu leiktíð og jafnvel lengur. Þetta kemur fram í tilkynningu frá handknattleiksdeild ÍBV í kvöld.
Cots kemur til ÍBV frá Stjörnunni.
Cots, sem er landsliðskona Senegal, hefur leikið hér á landi síðustu fjögur árin. Í upphafi var hún í tvö ár með FH en síðustu tvö ár með Stjörnunni. Hún var á meðal markahæstu leikmanna beggja liða, ekki síst hjá FH þar sem Cots var burðarás.
Cots lék síðast með landsliði Senegal á Afríkumeistaramótinu og undankeppni HM á síðasta vetri.
„Við erum mjög ánægð með að Britney hafi ákveðið að ganga til liðs við okkur og hlökkum til að sjá hana inná vellinum,“ segir í tilkynningu frá handknattleiksdeild ÍBV í kvöld og ljóst að Eyjaliðið ætlar að verða áfram í allra fremstu röð á næstu leiktíð.
