- Auglýsing -
- Óskar Bjarni Óskarsson og Heimir Ríkarðsson stýra liði Íslands- og bikarmeistara Vals í dag þegar ÍBV verður sótt heim í bikarkeppni HSÍ, 16-liða úrslitum. Leikur liðanna hefst klukkan 14 í íþróttamiðstöðinni í Vestmannaeyjum. Snorri Steinn Guðjónsson þjálfari Vals var úrskurðaður í eins leiks bann á fundi aganefndar HSÍ á þriðjudaginn eins og handbolti.is sagði frá.
- Sveinn Jóhannsson og samherjar í Skjern höfðu betur í grannaslag við TTH Holstebro í dönsku úrvalsdeildinni í gærkvöld, 33:28, eftir að jafnt var að loknum fyrri hálfleik, 14:14. Sveinn skoraði ekki í leiknum. Halldór Jóhann Sigfússon er aðstoðarþjálfari Holstebro sem er í sjöunda sæti deildarinnar með 17 stig eftir 18 leiki. Skjern situr sem fyrr í 5. sæti með 23 stig.
- Franski landsliðsmaðurinn Timothey N’Guessan verður vart með franska landsliðinu á HM í næsta mánuði eftir að hafa meiðst á handlegg í viðureign Barcelona og Nantes í Meistaradeild Evrópu í handknattleik í fyrrakvöld. Reiknað er með að N’Guessan verði frá keppni í allt að sex vikur.
- Samherji N’Guessan hjá Barcelona, Haniel Langaro, verður örugglega ekki með brasilíska landsliðinu á HM. Hann sleit hásin í leiknum í Nantes í fyrrakvöld.
- Árlegur stjörnuleikur í handknattleik fer fram í íþróttamiðstöðinni í Vestmannaeyjum klukkan 17 í dag. „Viðburður sem ekki þarf að kynna fyrir neinum, en okkar helstu stjörnur stíga fram á gólfið og sýna flott takta. Um er að ræða styrktarleik eins og venjulega, til styrktar Krabbavarnar í Vestmannaeyjum,“ segir m.a. í tilkynningu frá handknattleiksdeild ÍBV.
- Auglýsing -