Snorri Steinn Guðjónsson þjálfari Vals verður í leikbanni á laugardaginn þegar Valur sækir ÍBV heim í 16-liða úrslitum bikarkeppninnar í handknattleik. Hann var úrskurðaður í eins leiks bann á fundi aganefndar HSÍ í gær en úrskurðurinn var birtur í dag á heimasíðu HSÍ.
Þar segir að Snorri Steinn hafi hlotið útilokun með skýrslu vegna mjög grófrar ódrengilegrar hegðunar í leik Aftureldingar og Vals í Olísdeild karla á síðasta föstudag. Spjaldið fékk Snorri Steinn eftir að leiktíminn var úti en mörgum var heitt í hamsi á síðustu sekúndum leiksins sem var afar spennandi.
„Dómarar meta að brotið falli undir reglu 8:10 a). Með tilvísun í 10. gr. reglugerðar HSÍ um agamál er það niðurstaða aganefndar að starfsmaðurinn er úrskurðaður í eins leiks bann,“ segir í úrskurðinum sem lesa má hér.
Sigurður Páll Matthíasson leikmaður Víkings hlaut útilokun með skýrslu vegna mjög grófrar ódrengilegrar hegðunar í leik Stjörnunnar og Víkings í bikarkeppni 3.flokks karla þann 11.12.2022. Sigurður Páll var einnig úrskurðaður í eins leiks bann á fundi aganefndar í gær.
