Aron Kristjánsson og liðsmenn landsliðs Barein hrepptu silfurverðlaun í handknattleikskeppni karla á Asíuleikunum í Hangzhou í austurhluta Kína. Barein tapaði fyrir Katar, 32:25, í úrslitaleik sem lauk í hádeginu að íslenskum tíma. Í morgun hafnaði japanska landsliðið, undir stjórn Dag Sigurðssonar, í fjórða sæti eftir naumt tap fyrir Kúveit, 31:30, í viðureign um bronsverðlaun.
Bareinar og Katarar hafa mæst í nokkrum úrslitaleikjum í Asíumótum á síðustu árum. Katarar hafa yfirleitt haft betur. Sú varð einnig raunin að þessu sinni þótt Barein hafi verið tveimur mörkum yfir í hálfleik, 14:12. Katarar náðu yfirhöndinni snemma í síðari hálfleik og gáfu ekkert eftir.
Ekkert frí framundan
Þrátt fyrir að Asíuleikunum sé lokið eru íslensku þjálfararnir ekki komnir í frí. Framundan er forkeppni fyrir Ólympíuleikana. Hún hefst 18. október í Doha í Katar. Þar mætir Erlingur Richardsson einnig til leiks með landslið Sádi Araba sem heltist úr lestinni eftir riðlakeppni Asíuleikanna.
Forkeppnin stendur yfir til 28. október og tryggir sigurliðið sér sæti í handknattleikskeppni karla á Ólympíuleikunum í París næsta sumar. Auk þess kemst a.m.k. eitt lið til viðbótar í forkeppni sem haldið verður í Evrópu í mars.
Stórsigur Japans
Í handknattleikskeppni kvenna á Asíuleiknum vann japanska landsliðið Suður Kóreu, 29:19, í úrslitaleik í morgun. Með sigrinum hefndi japanska landsliðið fyrir tapið í forkeppni Ólympíuleikanna sem fram fór í síðasta mánuði í Hírosíma.
Kínverjar unnu Kasaka í leiknum um bronsverðlaunin, 39:26.
Japan 🇯🇵 🥇🤩
— Asian Handball Federation (@Ahf__official) October 5, 2023
Men’s Handball 🤾♀️
19th Asian Games – Hangzhou, China#hangzhou2022 #china pic.twitter.com/Oc8AZ3MPd7