„Nú hefst undirbúningur við glímuna við Stefán vin minn,“ sagði Ágúst Þór Jóhannsson þjálfari kvennaliðs Vals glaður á brún og brá eftir öruggan sigur, 28:20, á ÍBV í undanúrslitum Coca Cola-bikars kvenna í handknattleik á Ásvöllum í gærkvöld.
Valur mætir Fram í úrslitaleik á morgun klukkan 13.30 en Framarar kjöldrógu Íslands- og bikarmeistara KA/Þórs í hinni viðureign undanúrslitanna, 31:23. Stefán sem Ágúst nefndi er Stefán Arnarson, hinn sjóaði þjálfari Fram. Ágúst og Stefán hafa marga hildi háð á handknattleiksvellinum með leikmönnum sínum.
Alltaf stórleikir
„Viðureignir Fram og Vals eru alltaf stórleikir enda eru þar á ferðinni tvö frábær handboltalið. Alltaf er gert ráð fyrir því að Valur og Fram leiki til úrslita í öllum mótum alveg sama hver staðan er á leikmannahópum liðanna hverju sinni. Vonandi fáum við frábæran úrslitaleik á laugardaginn.
Framliðið leit mjög vel út í undanúrslitaleiknum við KA/Þór. Leikmenn voru mjög sprækir og Hafdís [Renötudóttir] frábær í markinu. Ég og leikmenn mínir búum okkur undir mjög erfiðan leik. Vonandi fjölmennir fólk á leikinn því við viljum sjá full áhorfendastæðin og brjálaða stemningu,“ sagði Ágúst.
Spurður út í sigurinn örugga á ÍBV í gærkvöld sagði Ágúst Þór að allt hefði gengið upp hjá sínu liði. Hernaðaráætlunin hafi heppnast.
Náðum taktinum úr sóknarleik ÍBV
„Bakverðir okkar sóttu mjög langt fram á sóknarmenn ÍBV auk þess sem við reyndum að klippa út hornamennina. Þetta gekk vel og þannig náðum við taktinum úr sóknarleik Eyjaliðsins.
Í síðari hálfleik tókst ÍBV-liðinu aðeins að koma til baka og minnka muninn í fjögur mörk með því að fara í sjö á sex í sókninni. Okkur tókst að svara því. Heilt yfir var varnarleikurinn og markvarslan frábær hjá okkur. Eftir því sem leið á leikinn þá tókst okkur að ná betri tökum á seinni bylgjunni í sóknarleik okkar eftir örlítið óðagot framan af,“ sagði Ágúst Þór glaður í bragði með sigurinn örugga og sæti í úrslitum Coca Cola-bikarsins á morgun, laugardag.
Uppskrift að góðum úrslitum.
„Sóknarleikurinn var einnig vel út færður. Stelpurnar skutu vel á markið, léku sig í góð færi og töpuðu sjaldan boltanum. Eins skiluðu þær sér hratt og vel til baka í vörnina. Þetta er uppskrift að góðum úrslitum.
„Sem betur fer varð þetta aldrei spennuleikur. Ég er mjög ánægður með það,“ sagði Ágúst Þór Jóhannsson þjálfari Vals í þann mund sem hann yfirgaf Ásvelli á ellefta tímanum í gærkvöldi.
