Tveir síðustu leikir Olísdeild karla í handknattleik fara fram í kvöld. Bikarmeistarar Fram sækja Valsmenn heim á Hlíðarenda kl. 20.15. Eftir sigur FH á Haukum í gærkvöld er FH tveimur stigum á undan Fram og þremur stigum ofar en Valur. Úrslit leiksins í kvöld hafa þar af leiðandi mikið að segja fyrir toppbaráttuna í Olísdeildinni. Um leið er þetta fyrsti leikur Framara eftir að þeir urðu bikarmeistarar um síðustu helgi.
Fram og Valur skildu jöfn í fyrri leiknum sem fram fór í Lambhagahöllinni í lok október, 31:31. Fram hafði betur þegar liðin mættust í átta liða úrslitum Poweradebikarsins, einnig í Lambhagahöllinni rétt fyrir jólin síðustu, 35:32.
Afturelding fær Stjörnuna í heimsókn að Varmá klukkan 19.30. Afturelding er fjórum stigum á eftir FH og má vart við að tapa stigum í leiknum ætli liðið sér að elta liðin fyrir ofan. Stjarnan er í 7. sæti með 18 stig.
Afturelding vann fyrri viðureign liðanna í Olísdeildinni sem fram fór í Hekluhöllinni 24. október, 36:29.
Olísdeild karla, 19. umferð:
Varmá. Afturelding – Stjarnan, kl. 19.30.
N1-höllin: Valur – Fram, kl. 20.15.
Staðan og næstu leikir í Olísdeildum.
– Báðir leikir kvöldsins verða sendir út á Handboltapassanum. Þar að auki verður viðureign Vals og Fram send út í opinni dagskrá í sjónvarpi Símans.
