Erlingur Birgir Richardsson hættir þjálfun karlaliðs ÍBV í handknattleik þegar keppnistímabilinu lýkur í vor. Þetta staðfestir Vilmar Þór Bjarnason framkvæmdastjóri handknattleiksdeildar ÍBV í samtali við Eyjafréttir í kvöld.
Ekki liggur fyrir hver tekur við starfinu af Erlingi sem þjálfað hefur ÍBV frá 2018 að þessu sinni. Leit stendur yfir þessa dagana að næsta þjálfara.
Uppfært: Á Facebook síðu handknattleiksdeildar ÍBV segir að Erlingur hafi ákveðið að nýta sér uppsagnarákvæði í samningi sínum.
ÍBV lék til úrslita um Íslandsmeistaratitilinn á síðasta vori og varð bikarmeistari undir stjórn Erlings 2020.
ÍBV situr í sjöunda sæti Olísdeildar karla um þessar mundir en hefur leikið tveimur til þremur leikjum færra en önnur lið deildarinnar.
Staðan og næstu leikir í Olísdeild karla.
