- Auglýsing -
Örvhenti hornamaðurinn eldfljóti, Gauti Gunnarsson, hefur ákveðið að ganga til liðs við Stjörnuna eftir að hafa leikið með ÍBV undanfarin tvö ár.
Gauti er 23 ára gamall og uppalinn í Vestmannaeyjum. Hann hefur leikið með ÍBV ef undan er skilið tímabilið 2022/2023. Þá lék Gauti með KA.
„Við erum gríðarlega ánægðir með að fá Gauta til liðs við okkur. Gauti er leikmaður sem leggur mikið á sig og fellur vel inn í hugmyndafræðina okkar,“ segir Hrannar Guðmundsson, þjálfari meistaraflokksliðs Stjörnunnar í tilkynningu.
Stjarnan hafnaði í sjöunda sæti Olísdeildar karla í vetur og féll út fyrir Val í átta liða úrslitum. Einnig komst Stjarnan alla leið í úrslit Poweradebikarsins en beið lægri hlut fyrir Fram í úrslitaleik.
- Auglýsing -
