Íslendingar voru aðsópsmiklir víðast hvar

Íslenskir handknattleikmenn voru afar áberandi í flestum leikjum kvöldsins í Meistaradeild Evrópu í handknattleik í kvöld. Þeir skoruðu m.a. 24 mörk og komu flestir mikið við sögu.

Ómar Ingi Magnússon skoraði 10 mörk og átti eina stoðsendingu sem skilaði marki og Gísli Þorgeir Kristjánsson skoraði fimm mörk og gaf þrjár stoðsendingar í fimm marka sigri Þýskalandsmeistara SC Magdeburg á Porto, 41:36, í A-riðli keppninnar. Leikurinn fór fram í Magdeburg og reyndist hin besta skemmtun. Marrhias Musche skoraði einnig 10 mörk fyrir Magdeburg sem var með fimm marka forskot í hálfleik, 22:17.

Bjarki Már Elísson var undantekning frá reglunni um Íslendingana í kvöld. Hann skoraði ekki mark í sigurleik Veszprém á PPD Zagreb, 32:28, í Veszprém í kvöld. Veszprém er annað af tveimur taplausum liðum í keppninni enn sem komið er.

Í þriðja leik kvöldsins í A-riðli vann Dinamo Búkarest liðsmenn Wisla Plock frá Póllandi, 32:27.

Haukur skoraði 6 mörk

Haukur Þrastarson fékk óvenjumikið að leika með Kielce í kvöld þegar liðið vann Orra Frey Þorkelsson og samherja í norska meistaraliðinu Elverum, 37:33, í Kielce en liðin eru í B-riðli. Haukur skoraði sex mörk og var næst markahæstur. Einnig átti Selfyssingurinn þrjár stoðsendingar sem skiluðu að endingu mörkum.

Orri Freyr Þorkelsson stóð sig einnig vel með Elverum og skoraði m.a. þrjú mörk.

THW Kiel og Barcelona skildu jöfn í öðrum leik kvöldsins í B-riðli, 30:30, í Kiel. Barcelona tapaði þar með stigi í fyrsta sinn í keppninni á leiktíðinni.

Staðan í A-riðli:

Staðan í B-riðli: