Kvennalandsliðið í handknattleik tekur þátt í forkeppni heimsmeistaramótsins sem fer fram í Skopje í Norður-Makedóníu á næsta föstudag, laugardag og á sunnudag. Íslensku landsliðskonurnar héldu af landi brott snemma í morgun ásamt fríðu föruneyti. Framundan er langt og strangt ferðalag sem hefst með flugi til Stokkhólms, þaðan til Kastrup í Kaupmannahöfn. Eftir nokkurra klukkustunda stans á Kastrup heldur hópurinn áfram með flugi til Vínarborgar þaðan sem lagt verður upp í síðasta legg ferðarinnar til Skopje, höfuðborgar Norður-Makedóníu.
Kjartan Vídó Ólafsson, markaðsstjóri Handknattleikssambands Íslands sem er með í för, sagði í samtali við handbolta.is í gær reikna með að hópurinn verði kominn inn á hótel í Skopje upp úr í klukkan 2 aðfaranótt mánudags gangi áætlanir eftir.
Íslenska liðið fær góðan tíma til æfinga saman í Skopje áður en fyrsti leikur forkeppninnar verður á föstudagskvöld gegn landsliði Norður-Makedóníu. Daginn eftir leikur íslenska landsliðið á móti liði Grikkja og loks við Litháen á sunnudaginn. Tvö af fjórum liðum komast áfram í umspilsleiki um sæti á heimsmeistaramótinu sem fram fer á Spáni í desember. Það er því eftir miklu að slægjast.
Undirbúningur íslenska landsliðsins hófst á föstudaginn með æfingu og eins var æft í gær undir stjórn Arnars Péturssonar landsliðsþjálfara. Þráðurinn verður tekinn upp í Skopje á morgun.
Meðfylgjandi eru nokkrar myndir sem teknar voru á Keflavíkurflugvelli í morgun og á æfingum landsliðsins síðustu daga.
![](https://www.handbolti.is/wp-content/uploads/2021/03/160411205_777323099835331_5546513263209507138_n-1024x768.jpg)
![](https://www.handbolti.is/wp-content/uploads/2021/03/160496118_438253367287294_7873947862650748427_n-1-1024x768.jpg)
![](https://www.handbolti.is/wp-content/uploads/2021/03/160715310_1707592252757113_2068296479997687944_n-1024x768.jpg)
![](https://www.handbolti.is/wp-content/uploads/2021/03/159794396_4106092666102766_2818136512318553751_o-1024x768.jpg)
![](https://www.handbolti.is/wp-content/uploads/2021/03/159872966_4106092252769474_8126362305184157122_o-1024x768.jpg)
![](https://www.handbolti.is/wp-content/uploads/2021/03/159889920_4106092249436141_5602113163690031368_o-1024x768.jpg)
![](https://www.handbolti.is/wp-content/uploads/2021/03/159903341_4106092469436119_4737041653973255008_o-1024x768.jpg)
![](https://www.handbolti.is/wp-content/uploads/2021/03/160000264_4106092522769447_1796604225345097205_o-1024x768.jpg)
![](https://www.handbolti.is/wp-content/uploads/2021/03/160923972_448957546332823_8474261410323780870_n-1024x768.jpg)