Síðari leikur RK Partizan Belgrad og AEK Aþenu í átta liða úrslitum Evrópubikarkeppni karla í handknattleik fer fram á mánudaginn 7. apríl í Shumen í austurhluta Búlgaríu. Leikurinn fer fram fyrir luktum dyrum og hefst klukkan níu árdegis að íslenskum tíma.
Handknattleikssamband Evrópu, EHF, ákvað þetta í gær.
Til stóð að Partizan og AEK mættust í Belgrad á sunnudaginn var en rétt áður en flautað var til leiks gengu leikmenn AEK af leikvelli. Eftir sð reyksprengjur sprungu á leikvellinum sögðu AEK-menn að öryggi þeirra væri ekki tryggt. Neituðu þeir að hefja leikinn og yfirgáfu keppnishöllina eftir nokkurt þref.
Á mánudaginn tilkynnti EHF að leikurinn skyldi fara fram og á hlutlausum velli.
AEK með fimm marka forskot
AEK vann fyrri viðureignina sem fram fór í Aþenu, 27:22. Samanlagður sigurvegari í viðureign AEK og RK Partizan mætir Bosníumeisturum HC Izvidac sem lagði Hauka í átta liða úrslitum.
Í hinni viðureign undanúrslita eigast við HC Alkaloid frá Norður Makedóníu og norska liðið Runar Sandefjord.
