Norska liðið Vipers Kristiansand, sem unnið hefur Meistaradeild Evrópu í kvennaflokki þrjú ár í röð, verður ekki með þegar leikið verður til úrslita í keppninni í Búdapest 1. og 2. júní. Tveggja marka sigur Vipers á Györ, 28:26, í síðari viðureign liðanna í átta liða úrslitum í gær hrökk skammt. Györ vann fyrri viðureignina sem fram fór í Noregi með sjö marka mun, 30:23.
Fjögur lið frá fjórum löndum
Franska meistaraliðið er einnig komið í undanúrslit og tekur þátt í úrslitahelginni í Búdapest ásamt Þýskalandsmeisturum Bietigheim og danska meistaraliðinu Esbjerg.
Bietigheim hefur aldrei náð svo langt í Meistaradeildinni. Liðið lagði Odense Håndbold samanlagt með tveggja marka mun, 60:58. Odense vann heimaleikinn í dag, 32:30. Kelly Dulfer og Xenia Smits skoruðu sjö mörk hvor fyrir Bietigheim. Andrea Hansen skoraði einnig sjö mörk fyrir Óðinsvéaliðið.
Jamina Roberts skoraði átta mörk fyrir Vipers og Jana Knedlikova fyrrverandi leikmaður Györ skoraði sjö mörk. Ana Gros skoraði sex mörk fyrir Györ og norska landsliðskonan Veronika Kristiansen var næst með fimm mörk.
Öruggt hjá Metz
Metz vann rúmensku meistarana CSM frá Búkarest öðru sinni í Metz í gær, 29:23, og samanlagt, 56:47. Aliana Grijseels skoraði sjö sinnum fyrir Metz. Að vanda var Cristina Neagu atkvæðamest hjá CSM með sex mörk.
Esbjerg öflugt á heimavelli
Esbjerg vann öruggan sigur á ungverska liðinu FTC í síðasta leik átta liða úrslita í Esbjerg í dag, 29:24. Eftir eins marks sigur í Búdapest fyrir viku þá tóku leikmenn Esbjerg heimaleikinn í dag föstum töku. Forskotið var sjö mörk í hálfleik, 17:10. Leikmenn börðust af krafti framan af síðari hálfleik og tókst að minnka muninn í tvö mörk, 24:22, þegar 11 mínútur voru til leiksloka. Nær komust þeir ekki. Anna Kristensen, markvörður Esbjerg, sá m.a. til þess. Hún átti stórgóðan leik í marki Esbjerg, varði 14 skot, 38%.
Sanna Solberg skoraði sex mörk í sex skotum fyrir Esbjerg og var markahæst. Live Rushfeldt Deila var næst með fimm mörk. Katrín Klujber skoraði átta mörk fyrir FTC.
Dregið á þriðjudaginn
Dregið verður á þriðjudaginn í Búdapest um hvaða lið mætast í undanúrslitum Meistaradeildar kvenna 1. júní í MWM Dome í Búdapest. Daginn eftir verður leikið til úrslita.
Einnig verður dregið til undanúrslita í undanúrslitum í Meistaradeild karla í Búdapest á þriðjudaginn. Úrslitahelgi Meistaradeildar karla verður 8. og 9. júní í Köln.
