Áfram eru Díana Dögg Magnúsdóttir og samherjar hennar í BSV Sachsen Zwickau í harðri baráttu við að forðast fall úr þýsku 1. deldinni í handknattleik. Í gær töpuðu þær með níu marka mun fyrir Bensheim-Auerbach, 33:24, á heimavelli og sitja í 11. sæti af 14 liðum. Eyjakonan gat ekki leikið með liði sínu allt til leiksloka vegna meiðsla.
Snemma í síðari hálfleik fékk Díana Dögg þungt högg á rifbeinin og kom ekki meira við sögu eftir það. Þá hafði hún skorað þrjú mörk, átt þrjár stoðsendingar, unnið einn ruðning og náð einu frákasti.
Í gærkvöld sagði Díana Dögg vonast til að vera með í næsta leik BSV Sachsen Zwickau þrátt fyrir höggið. Næsti leikur skiptir miklu máli en hann verður við SV Union Halle-Neustadt sem er jafnt BSV Sachsen Zwickau að stigum. Hvort lið hefur 10 stig í 10. og 11. sæti. Sigurliðið fer langt með að tryggja veru sína í deildinni á næstu leiktíð. Fimm umferðir eru eftir.
Fækkað um tvö lið
Liðum efstu deildar þýska kvennahandknattleiksins verður fækkað um tvö á næstu leiktíð. Farið verður úr 14 liða deild í 12 lið.
Bikarmeistarar Metzingen, sem Sandra Erlingsdóttir er samingsbundin, er í sjötta sæti með 22 stig. Sandra er í fæðingarorlofi.
Staðan:
