Svíinn Tomas Svensson hefur látið af störfum með A-landsliði karla handknattleik að eigin ósk og hefur Handknattleiksamband Íslands (HSÍ) orðið við ósk hans, eftir því sem HSÍ greinir frá í tilkynningu.
Ástæða þessa er sú að Svensson hefur verið ráðinn markvarðaþjálfari sænska karlalandsliðsins í stað Mats Olsson. Sænska handknattleikssambandið greindi frá ráðningu Svensson fyrir stundu.
Svensson hefur unnið með Guðmundi Þórði Guðmundssyni, landsliðsþjálfara, síðan að Guðmundur tók við þjálfun landsliðsins í febrúar fyrir þremur árum. Einnig starfaði Svensson við hlið Guðmundar þegar sá síðarnefndi þjálfaði danska karlalandsliðið frá 2014 til 2017 og hjá Rhein-Neckar Löwen frá 2010 til 2014.
„Það hefur verið mikill heiður fyrir mig að fá að starfa fyrir HSÍ og íslenska landsliðið. Ég á eftir að sakna samstarfsins við Guðmund, strákanna í landsliðinu, starfsfólk landsliðsins og HSÍ,“ segir Svensson í tilkynningu frá HSÍ.
Ekki er ljóst hvort einhver eða hver taki við starfi Svensson sem hafði þjálfun markavarða landsliðsins á sinni könnu auk annars.
