THW Kiel hafði betur í heimsókn sinni til þýsku meistaranna SC Magdeburg, 34:33, í 1. deild karla í gær. Frábær endasprettur meistaranna dugði þeim ekki til að öngla í annað stigið. Kiel var þremur mörkum yfir í hálfleik, 19:16, og náði átta marka forskoti þegar um 20 mínútur voru til leiksloka, 26:18.
Aðsópsmiklir að vanda
Ómar Ingi Magnússon og Gísli Þorgeir Kristjánsson leikmenn Magdeburg komu að vanda mikið við sögu í leiknum. Ómar Ingi skoraði 9 mörk og átti þrjár stoðsendingar. Fimm marka sinna skoraði Ómar Ingi af vítapunktinum hvar hann var með fullkomna nýtingu.
![](https://handbolti.is/wp-content/uploads/2022/10/C4_2426.jpg)
Gísli Þorgeir skoraði fjögur mörk og átti fjórar stoðsendingar.
Nikola Bilyk skoraði 34. mark Kiel þegar 27 sekúndur voru til leiksloka að viðstöddum 6.600 áhorfendum í Magdeburger Arena. Uppselt var á leikinn. Daninn Magnus Saugstrup klóraði í bakkann fyrir Magdeburg þegar um 15 sekúndur voru til leiksloka.
Tylltu sér á toppinn
Kiel er efst í deildinni með 22 stig eftir 13 leiki. Hætt er við að dvöl liðsins á toppnum verði skammvinn vegna þess að Füchse Berlin leikur við Lemgo í dag. Berlínarliðið er einu stigi á eftir Kiel. Magdeburg er fimm stigum á eftir Kiel í fjórða sæti en á tvo leiki til góða. Væntanlegir mótherjar Vals á þriðjudagskvöldið, Flensburg, er jafnt Magdeburg að stigum. Flensburg sækir MT Melsungen heim í dag.
Áfram í þriðja sæti
Ýmir Örn Gíslason og samherjar í Rhein-Neckar Löwen sitja áfram í þriðja sæti þýsku 1. deildar karla í handknattleik eftir sigur á Erlangen í Nürnberg í gærkvöld, 33:30. Ýmir Örn skoraði eitt mark og var að vanda aðsópsmikill við varnarleikinn.
Erlangen var tveimur mörkum yfir að loknum fyrri hálfleik, 18:16. Ólafur Stefánsson er aðstoðarþjálfari Erlangen.
![](https://handbolti.is/wp-content/uploads/2020/10/arnorthor-1024x683.jpg)
Arnór Þór skoraði þrisvar
Arnór Þór Gunnarsson skoraði þrjú mörk, ekkert þeirra úr vítaköstum, í gærkvöld í sigurleik Bergischer HC á botnliði ASV Hamm-Westfalen, 31:27, í Westpress Arena, heimavelli Hammingja.
Bergischer HC færðist upp í 11. sæti með sigrinum, stigi fyrir ofan Leipzig sem sækir Stuttgart heim í dag.