HF Karlskrona er fallið úr leik í úrslitakeppni sænsku úrvalsdeildarinnar í handknattleik karla. Karlskrona tapaði í þriðja sinn fyrir IK Sävehof í kvöld, 33:30. Leikið var á heimavelli Sävehof sem tapaði einum af fjórum viðureignum í úrslitakeppninni. Sävehof mætir deildarmeisturunum Ystads í undanúrslitum. Fyrsta viðureignin fer fram að viku liðinni.
Framlengja varð leikinn í kvöld til þess að knýja fram sigur á annan hvorn veginn. Leikmenn Sävehof jöfnuðu metin, 27:27, hálfri annarri mínútu fyrir lok hefðbundins leiktíma. Bæði lið fengu tækifæri til þess að tryggja sér sigurinn en allt kom fyrir ekki.
Leikmenn Sävehof voru sterkari í framlengingu.
Tryggvi Þórisson skoraði ekki fyrir Sävehof í leiknum.
Ólafur skoraði tvö
Ólafur Andrés Guðmundsson skoraði tvö mörk fyrir HF Karlskrona. Dagur Sverrir Kristjánsson var ekki í leikmannahópi liðsins. Phil Döhler markvörður lék væntanlega sinn síðasta leik fyrir Karlskrona liðið. Í upphafi árs kom fram að hann ætlaði að færa sig um set eftir leiktíðina.
