Valur varð í kvöld Íslandsmeistari í handknattleik kvenna annað árið í röð og í nítjánda sinn frá upphafi þegar liðið lagði Hauka, 28:25, í þriðja úrslitaleiknum um Íslandsmeistartitilinn í N1-höllinni á Hlíðarenda. Annað árið í röð fór Valur einnig í gegnum úrslitakeppnina án taps.
Alls lék Valur 30 leiki á tímabilinu og vann 29, tapaði aðeins einum og þá fyrir Haukum í lok október. Ekki verður efast um að Íslandsbikarinn er í höndum verðskuldaðra meistara.
Eftir erfiða byrjun í leiknum í kvöld vegna talsverðrar spennu í leikmönnum þá tókst Val að vinna sig inn í leikinn. Haukar skoruðu sex af fyrstu átta mörkunum. Valur sneri við taflinu eftir leikhlé og komst yfir. Haukar voru mark yfir í hálfleik, 12:11.
Þrátt fyrir kaflaskipti var Valur öflugri í síðari hálfleik og vann verðskuldaðan sigur þegar upp var staðið.
Hafdís mikilvægust
Hafdís Renötudóttir, markvörður Vals, var valin miklvægasti leikmaður úrslitakeppninnar. Hún fór á kostum, ekki síst í tveimur síðustu leikjunum af þremur í úrslitarimmunni við Hauka.
Haukar féllu úr leik í undanúrslitum í fyrra. Að þessu sinni komst liðið skrefinu lengra og fékk silfur. Hvað gerist á næsta ári?
Mörk Vals: Elín Rósa Magnúsdóttir 6, Thea Imani Sturludóttir 6, Þórey Anna Ásgeirsdóttir 6, Lilja Ágústsdóttir 4, Hildigunnur Einarsdóttir 3, Morgan Marie Þorkelsdóttir 2, Ásdís Þóra Ágústsdóttir 1.
Varin skot: Hafdís Renötudóttir 20.
Mörk Hauka: Sara Odden 7, Elín Klara Þorkelsdóttir 6, Sara Katrín Gunnarsdóttir 4, Inga Dís Jóhannsdóttir 3, Sonja Lind Sigsteinsdóttir 2, Alexandra Líf Arnarsdóttir 2, Ragnheiður Ragnarsdóttir 1.
Varin skot: Margrét Einarsdóttir 10.
Öll tölfræði leiksins hjá HBStatz.
Handbolti.is í var á Hlíðarenda og fylgdist með leiknum í textalýsingu hér fyrir neðan.
