Landsliðsmarkvörðurinn Viktor Gísli Hallgrímsson heldur áfram að fara á kostum með Nantes í frönsku 1. deildinni í handknattleik. Í kvöld var hann með 39% hlutfallsmarkvörslu, 14 skot, þann tíma sem hann stóð í marki Nantes í stórsigri á Saran, 38:24, á heimavelli.
Toppslagur á sunnudag
Þetta var þriðji sigurleikur Nantes á viku í deildinni heimafyrir og í Evrópudeildinni. Nantes er í öðru sæti frönsku 1. deildarinnar með 19 stig eftir 11 leiki. Montpellier hefur einnig 19 stig en á leik til góða. PSG gefur ekki þumlung eftir og er áfram efst með 20 stig að loknum 10 leikjum. Leikmenn Montpellier sækja liðsmenn PSG heim á sunnudagskvöld.
43' 🫣
— HBCNantes (@HBCNantes) November 24, 2023
Tacle dans le but vide, 7m arrêté. (𝟐𝟓-𝟏𝟎)
On est sur une Masterclass de Viktor.
Poke @matgonesOL #HBCNSARAN pic.twitter.com/gHfY9iWg7O
Mikilvægur sigur hjá Ivry
US Ivry, sem Darri Aronsson er samningsbundinn, vann mikilvægan sigur PAUC, 29:28, í París í kvöld. Darri er ennþá fjarverandi vegna meiðsla og verður frá þangað til snemma á næsta ári.
Donni frá vegna meiðsla
Eftir því sem næst verður komist var Kristján Örn Kristjánsson, Donni, ekki með PAUC í kvöld. Hann hefur ekki verið með liðinu í síðustu þremur leikjum vegna meiðsla í öxl sem hafa verið að gera honum gramt í geði um talsvert skeið.
Upp af botninum
Ivry lyftist upp úr neðsta sæti deildarinnar með sigrinum í kvöld og er nú í 14. sæti af 16 liðum með fimm stig. Dijon og Saran eru neðar. PAUC er í sjöunda sæti og virðist ætla að sigla lygnan sjó á þessari leiktíð eins og á þeirri síðustu.
Stöðuna í frönsku 1. deildinni og í fleiri deildum Evrópu er að finna hér.
Áfram halda Grétar og félagar að vinna
Grétar Ari Guðjónsson stóð í marki Sélestat annan hálfleikinn þegar liðið lagði Valence á útivelli í 2. deild franska handknattleiksins. Hafnfirðingurinn varði fjögur skot, 25%. Sélestat er í þriðja sæti með 18 stig eftir 11 leiki, er tveimur stigum á eftir Tremblay og Pontault.
Stöðuna í 2. deild franska handknattleiksins og í fleiri deildum Evrópu er að finna hér.
