Allt er í hnút í riðli Íslands á Evrópumóti U19 ára karlalandsliða í Króatíu. Eftir að hvert liðanna fjögurra í riðlinum hefur leikið tvisvar hefur hvert þeirra einn vinning og eitt tap. Þetta þýðir að möguleikar allra eru nokkuð jafnir fyrir lokaumferðina sem fram fer á morgun. Að henni lokinni fara tvö efstu lið hvers riðils mótsins, en þeir eru fjórir, í átta liða úrslit. Neðstu tvö lið úr hverjum riðli leika um níunda til sextánda sætið. Engir leikir verða á EM í dag.
Ísland mætir Serbíu á morgun. Serbar unnu Slóvena í gær 36:30 í kjölfar stórsigurs íslenska liðsins á Ítölum, 30:17. Í fyrstu umferð vann Slóvenía íslenska liðið, 26:22, og Ítalir unnu Serba, 28:26.
Íslenska liðið þarf þar af leiðandi helst á sigri að halda gegn Serbum á morgun. Jafntefli gæti þó nægt til að komast áfram. Leikur Íslands og Serbíu hefst klukkan 12.30 og verður hægt að fylgjast með endurgjaldslausri útsendingu frá viðureigninni á ehftv.com.
Spánverjar, Svíar, Þjóðverjar og Danir, undir stjórn Arnórs Atlasonar, eru öruggir áfram í átta liða úrslit og eins Króatar. Baráttan í D-riðli stendur á milli Frakka og Portúgala um að fylgja Króötum úr D-riðli og áfram í átta liða úrslit.
Spánn og Svíþjóð verða andstæðingar Íslands í átta liða úrslitum í næstu viku komist Ísland áfram í átta liða úrslit en Ungverjar og Ísraelar ef það verður hlutskipti íslenska liðsins að leika um níunda til sextánda sætið.
Íslensku piltarnir og þjálfarar þeirra tóku daginn snemma í Varazdin í Króatíu og fóru á góða æfingu eftir morgunmat. Björn Eiríksson liðsstjóri, eða King Bjössi eins og piltarnir nefna Björn, stjórnaði upphitun af röggsemi að sögn Magnúsar Kára Jónssonar fararstjóra íslenska landsliðsins.
„Framundan í dag er enn eitt covid testið, recovery með Adam sjúkraþjálfara og vídeófundur með myndböndum af Serbum,“ sagði Magnús Kári ennfremur en hann sendi handbolta.is myndir frá æfingunni í morgun. Nokkrar þeirra fylgja hér með.
