Fargi var létt af íslenska hópnum sem tekur þátt í heimsmeistaramótinu 19 ára landsliða karla í handknattleik í Kaíró eftir miðnætti í kvöld að egypskum tíma þegar 11 af 12 töskum með farangri s.s. keppnis- og æfingafatnaði skiluðu sér á hótel hópsins.
Ein taska í óvissuferð
„Nú horfir allt til betri vegar,“ sagði Magnús Kári Jónsson farar- og liðsstjóri íslenska hópsins kátur í bragði við handbolta.is rétt eftir að hann hafði tekið við töskunum, fullviss um að þetta væri þær réttu. Ekki liggur fyrir nær síðasta taskan kemur í hendur Magnúsar Kára og félaga sem eiga eftir að vera í 10 daga í viðbót í Egyptalandi.
HM19-’25: riðlakeppni, úrslit og staðan
Brussel, Frankfurt, Kaíró
Töskurnar 12 voru skildar eftir í Brussel á mánudaginn þar sem íslenski hópurinn millilenti í borginni og hafði nærri þriggja tíma stanz á flugvellinum áður haldið var áfram til Kaíró. Voru leikmenn og þjálfarar aðeins með brýnasta varning s.s. keppnisskó og keppnisbúninga og æfingatreyjur í handfarangri. Allt annað var í töskunum sem skildar voru eftir. Magnús Kári sagði við handbolta.is við aftureldingu á miðvikudaginn að ekki mætti dragast úr hömlu að farangurstöskurnar skiluðu sér á leiðarenda. „Það er ljóst að við þolum ekki marga daga án þess að fá töskurnar og það sem í þeim er,“ sagði Magnús Kári.
Til stóð að þær bærust í gærkvöld en sú von brast og var jafnvel farið að örla á svartsýni.
Vegna þess stopulla flugferða milli Brussel og Kaíró eru voru töskurnar sendar frá Brussel til Frankfurt þar sem þær biðu eftir að laust pláss væri fyrir aukafarangur í vél frá Frankfurt til Kaíró.
HM19-’25: Ljóst að við þolum ekki marga daga
