Þýska handknattleiksliðið Melsungen var að semja við franskan miðjumann Sadou Ntanzi sem kemur strax til liðsins sem er í miklum meiðslavandræðum. Ekki færri en sjö leikmenn Melsungen eru annað hvort meiddir eða veikir. Ekki síst mun vera skortur á leikstjórnendum.
Ntanzi er 25 ára gamall Frakki sem var á samningi hjá Al Arabi í Doha í Katar en á síðustu leiktíð var hann hjá Tatabánya í Ungverjalandi eftir að samningstímanum lauk hjá PSG sumarið 2024.
Svo mikill skortur er hjá Melsungen á leikmönnum vegna ástandsins að Isaias Guardiola aðstoðarþjálfari tók fram keppnisskóna og lék með liðinu gegn Eiseanch í þýsku 1. deildinni um síðustu helgi. Guardiola stendur á fertugu og hafði fyrir nokkru lagt skóna á hilluna góðu.
Franski landsliðsmaðurinn Aymeric Minne færir sig um set næsta sumar og gengur til liðs við Flensburg-Handewitt í Þýskalandi. Hann leikur nú með HBC Nantes í heimalandi sínu. Samningur Minne við Flensburg er til fjögurra ára, til ársins 2030.
Danski línumaðurinn Steven Plucnar Jacobsen heldur heim til Danmerkur næsta sumar og gengur til liðs við uppeldisfélag sitt, GOG. Jacobsen leikur nú með Rhein-Neckar Löwen.
