Elín Klara Þorkelsdóttir átti stórleik í sínum fyrsta leik með IK Sävehof í sænsku úrvalsdeildinni í dag. Hún skoraði níu mörk og átti þrjár stoðsendingar þegar IK Sävehof kjöldró meistara síðasta tímabils, Skara HF, 40:23, á heimavelli í Partille. Elín Klara geigaði ekki á markskoti í leiknum.
Elín Klara lék á als oddi og kom það þess vegna engum í opna skjöldu þegar hún var valin sú besta í leikslok. Elín Klara gekk til liðs við IK Sävehof í sumar frá Haukum.
Aldís Ásta Heimisdóttir skoraði tvö mörk og átti þrjár stoðsendingar fyrir Skara-liðið. Lena Margrét Valdimarsdóttir skoraði ekki mark fyrir Skara en átti fimm stoðsendingar.
Berta Rut skoraði fjögur mörk
Berta Rut Harðardóttir átti fínan leik með Kristianstad HK í jafntefli við HK Aranäs á heimavelli, 27:27. Berta Rut skoraði fjögur mörk í fimm skotum.
