Handknattleikskonan Ásdís Guðmundsdóttir hefur samið við sænska úrvalsdeildarliðið Skara HF. Hún fylgir þar með í kjölfar samherja síns hjá KA/Þór, Aldísar Ástu Heimisdóttur, sem fyrr í sumar samdi við sama félag.
Frá þessu greinir Vikudagur á Akureyri í morgun. Samningur Ásdísar við Skara HF er til tveggja ára.
Legið hefur ljóst fyrir síðan í lok síðasta keppnistímabils að Ásdís ætlaði að yfirgefa KA/Þór og reyna fyrir sér utan Íslands eftir góð ár með Akureyrarliðinu.
Ásdís, sem er línumaður, hefur verið ein af kjölfestum KA/Þórsliðsins á síðustu árum og einnig átt sæti í íslenska landsliðinu með reglubundnum hætti undanfarin tvö til þrjú ár.
Auk Ásdísar og Aldísar Ástu samdi markvörðurinn Sunna Guðrún Pétursdóttir við GC Amicitia Zürich og Rakel Sara Elvarsdóttir við Volda í Noregi. Eins mun Anna Mary Jónsdóttir hafa í hyggju að taka sér hlé frá handknattleik.
Skara HF hafnaði í sjötta sæti sænsku úrvalsdeildarinnar í vor og féll úr keppni í fyrstu umferð úrslitakeppninnar um sænska meistaratitilinn. Skara er frá samnefndum bæ nærri Gautaborg.
Sjö íslenskir handknattleikmenn leika efstu deild í Svíþjóð á næstu leiktíð. Skara HF: Aldís Ásta Heimisdóttir, Ásdís Guðmundsdóttir. Lugi: Ásdís Þóra Ágústsdóttir. Önnereds: Jóhanna Margrét Sigurðardóttir. Helsingborg: Ásgeir Snær Vignisson. Sävehof: Tryggvi Þórisson. Skövde: Bjarni Ófeigur Valdimarsson.
