Lærisveinum Aðalsteins Eyjólfssonar í Kadetten Schaffahausen féll allur ketill í eld í kvöld þegar þeir mættu Pfadi Winterthur í þriðja sinn í einvíginu um meistaratitilinn í handknattleik karla í Sviss. Þeir voru með vænlega stöðu eftir fyrri hálfleik en í þeim síðari má segja að allt hafi farið í skrúfuna, alltént þegar kom að sóknarleiknum.
Leikmenn Pfadi Winterthur unnu tvo fyrstu leikina og því var leikmönnum Kadetten nauðugur sá kostur að leggja allt í sölurnar í kvöld til þess að vinna og halda lífi í vonum sínum um meistaratitilinn. Kadetten var fjórum mörkum yfir að loknum fyrri hálfleik, 17:13. Það dugði skammt því eins og fyrr segir féll þeim allur ketill í eld í þeim síðari. Sóknarleikurinn fór til verri vegar og Kadetten skoraði aðeins sex mörk meðan leikmenn Winterthur skoruðu tólf sinnum og fóru með sigur úr býtum, 25:23.
Pfadi Winterthur er þar með meistari í Sviss í handknattleik karla í fyrsta sinn frá árinu 2004 og tíunda skipti.
Aðalsteinn og félagar fá silfrið í deildinni en þeir unnu bikarkeppnina í vor.
- Þýskaland hefur átta sinnum unnið verðlaun á HM
- Molakaffi: Vyakhireva, Smits, Polman, Abbingh, Vogel, Bölk, Pekeler, Heinevetter, Månson
- HM kvenna ”25 – dagskrá, úrslit – síðustu dagarnir
- Viggó og Andri Már höfðu betur gegn gömlum samherjum
- Kvöldkaffi: Bjarki, Dana, Óðinn, Jóhannes, Arnór, Grétar, Jón, Dagur, Elías
