Ein fremsta handknattleikskona sem Ísland hefur átt, Karen Knútsdóttir, lék sinn síðasta keppnisleik í dag þegar lið hennar Fram mætti Haukum í úrslitaleik Poweradebikarsins á Ásvöllum. Karen staðfesti þetta í samtali við Þorkel Gunnar Sigurbjörnsson hjá RÚV í leikslok.
Karen ætlaði að hætta í lok leiktíðar í vor en áætlanir hennar breyttust þegar í ljós kom að hún er barnshafandi.
„Já, þetta er í raun bara minn allra síðasti leikur. Ég á von á mínu þriðja barni. Ég var að vonast til að kveðja þetta betur. En það var gaman að taka þátt í þessari helgi. Og, já, gaman að fá spila handbolta hérna,“ sagði Karen í hjartnæmu viðtali við RÚV.
Karen tók fram skóna í haust eftir hlé og hefur leikið með Fram í Olísdeildinni í vetur.
Glæsilegur ferill
Karen hefur tvisvar orðið Íslandsmeistari með Fram 2018 og 2022 og bikarmeistari fjórum sinnum, 2010, 2011, 2018 og 2020 auk fjölda annarra einstaklingsviðurkenninga. Hún lék um árabil í atvinnumennsku í Danmörku, Frakklandi og í Þýskalandi. Landsleikirnir eru 106 og mörkin 371. Karen lék með landsliðinu á þremur stórmótum, EM 2010 og 2012 og á HM 2011.
