Valsmenn áttu erfitt uppdráttar gegn HC Vardar í viðureign liðanna í fyrstu umferð F-riðils Evrópdeildar karla í handknattleik í Sport Center Jane Sandanski í Skopje í kvöld. Vardarmenn voru talsvert öflugri og unnu öruggan sigur, 33:26. Sigur sem var aldrei ógnað. Átta marka munur var á liðunum að loknum fyrri hálfleik, 19:11.
Næsti leikur Vals verður við Porto í Kaplakrika á þriðjudaginn eftir viku þegar slegið verður upp handboltaveislu með tveimur viðureignum í Hafnarfirði.
Varnarleikur Vardar-liðsins var öflugur og Valsmönnum gekk illa að brjóta hann á bak aftur, ekki hvað síst í fyrri hálfleik. Upp úr miðjum hálfleik var staðan 13:7.
Þrátt fyrir að leikmenn næðu um skeið að minnka muninn í síðari hálfleik þá myndaðist aldrei spenna í Sport Center Jane Sandanski-íþróttahöllinni við Vardarfljótið.
Í hinum leik kvöldsins í riðlinum vann þýska liðið Melsungen liðsmenn FC Porto, 29:24, á heimavelli Porto. Þorsteinn Leó Gunnarsson skoraði fjögur mörk fyrir Porto. Elvar Örn Jónsson skoraði tvisvar fyrir Melsungen en Arnar Freyr Arnarsson skoraði ekki að þessu sinni.
Mörk Vals: Magnús Óli Magnússon 4, Allan Norðberg 3, Andri Finnsson 3, Ísak Gústafsson 3, Úlfar Páll Monsi Þórðarson 3, Bjarni Í Selvindi 3, Viktor Sigurðsson 2, Miodrag Corsovic 2, Alexander Petersson 2, Kristófer Máni Jónasson 1.
Varin skot: Björgvin Páll Gústavsson 18, 35,2%.
Mörk HC Vardar: Marko Srdanovic 6, Vuko Borozan 6, Lars Kooij 4, Stefan Petric 4, Milan Lazarevski 3, Achraf Margheli 3, Mario Tankoski 2, Mladen Krsmancic 2, Marija Nikolic 1, Michel Rodriguez 1, Coce Georgievski 1.
Varin skot: Miguel Ferreira 14, 35,9%.
Evrópudeild karla “24 – riðlakeppni 32-liða – 1. umferð, úrslit
