„Loksins er að koma að þessu. Við erum mættir og vel stemmdir,“ segir Janus Daði Smárason landsliðsmaður í handknattleik sem mættur er til þátttöku á sínu fjórða heimsmeistaramóti með íslenska landsliðinu. Fyrsti viðureignin verður annað kvöld gegn Grænhöfðaeyjum og hefst hún klukkan 19.30.
Janus Daði segir upphafsmarkmið landsliðsins vera skýrt; „Við ætlum að vinna riðilinn,“ svaraði hann hiklaust þegar handbolti.is hitti Janus að máli. Til þess að ná markmiðinu verður íslenska liðið þá að vinna Kúbumenn og Slóvena auk Grænhöfðeyinga annað kvöld.
Ennfremur segir Janus það vera skýrt að ef landsliðið ætli að standa við orð sín verði það að vera á fullu frá fyrsta leik. „Við verðum að mæta undirbúnir og framkvæma,“ segir Janus Daði Smárason.
Lengra myndskeiðsviðtal við Janus Daða er að finna hér fyrir ofan.
