Arnór Þór Gunnarsson og liðsmenn hans í Bergischer HC fögnuðu kærkomnum sigri í þýsku 1. deildinni í handknattleik í dag þegar þeir lögðu Rhein-Neckar Löwen á heimavelli, 30:27. Með sigrinum færðist Bergischer HC upp úr öðru af tveimur fallsætum deildarinnar. Liðið er nú með fimm stig og hefur Stuttgart og Leipzig fyrir neðan sig.
Nýliðar Bergischer hafa á tíðum verið lánlausir í leikjum sínum fram til þessa og misst stig á lokakaflanum. Að þessu sinni héldu þeir fengnum hlut og unnu góðan sigur á öflugu liði Rhein-Neckar Löwen sem hefur átt viðunandi gengi að fagna til þessa eftir töluverða uppstokkun í sumar.
Haukur Þrastarson skoraði fjögur mörk í átta skotum fyrir Rhein-Neckar Löwen og gaf fimm stoðsendingar.
Rhein-Neckar Löwen er í níunda sæti af 18 liðum deildarinnar með 12 stig eftir 12 leiki. Bergicher HC er með fimm stig eins og Wetzlar sem fær Gummersbach í heimsókn annað kvöld.
Stöðuna í þýsku 1. deild karla og í fleiri deildum evrópsks handknattleiks er að finna hér.
