SC Magdeburg og Veszprém unnu öðru sinni nokkuð fyrirhafnarlitla sigra á andstæðingum sínum á heimsmeistaramóti félagsliða Kaíró í dag. Magdeburg lagði Al Khaleej frá Sádi Arabíu, 35:28, og hreppti þar með efsta sætið í 1. riðli mótsins. Bjarki Már Elísson og liðsmenn Veszprém lögðu egypska liðið El Zamalek einnig með sjö marka mun, 34:27, í riðli tvö.
Bjarki Már lék síðari hálfleikinn með Veszprém og skoraði þrjú mörk, öll úr vinstra horni. Lukas Sandell og Nikola Grahovac skoruðu fimm mörk hvor og voru markahæstir hjá ungversku meisturunum.
Ómar Ingi Magnússon skoraði sex mörk og gaf fimm stoðsendingar í sigri Magdeburg snemma í dag. Gísli Þorgeir Kristjánsson skoraði þrisvar og átti þrjár stoðsendingar. Svíinn Isak Persson var markahæstur með níu mörk.
Frí verður á mótinu á morgun áður en leikið verður til undanúrslita á þriðjudaginn. Úrslitaleikir mótsins fara fram á miðvikudaginn.
Þegar riðlakeppninni verður lokið í kvöld skýrist hvaða lið mætast í undanúrslitum. Ljóst er að auk Veszprém og Magdeburg verður Barcelona einnig í undanúrslitum en hvert fjórða liðið verður liggur fyrir í kvöld.
