Afturelding vann sannfærandi sigur á HK, 28:24, í 16-liða úrslitum Powerade-bikarnum í handknattleik karla í Kórnum í kvöld og heldur þar með áfram tökum sínum á HK-liðinu á heimavelli þess. Kominn er um áratugur síðan Afturelding tapaði síðast fyrir HK í Kópavogi.
Mosfellingar voru með yfirhöndina í leiknum frá byrjun til enda, ekki síst fyrir góðan varnarleik og framúrskarandi frammistöðu Einars Baldvins Baldvinssonar markvarðar. Hann náði sér afar vel á strik eftir að hafa verið fjarri sínu besta í allra síðustu leikjum.
Afturelding var marki yfir í hálfleik, 14:13. Fljótlega í síðari hálfleik náðu Mosfellingar fjögurra marka forskoti. Sama var upp á hverju leikmenn HK brydduðu. Þeim tókst aldrei að hleypa spennu í viðureignina. Minnstur varð munurinn tvö mörk af og til.
Í hvert sinn sem HK-ingar áttu möguleika á að komast nær þá snerust vopnin í höndum þeirra í sókninni eða þá að Einar Baldvin lokaði markinu. Tvisvar tók HK leikhlé í síðari hálfleik og í bæði skiptin skoraði liðið ekki í sókninni sem kom í kjölfarið heldur kom það í hlut Aftureldingarmanna að auka á forskot sitt.
Auk Einars Baldvins þá fór Blær Hinriksson á kostum í liði Aftureldingar. Hann kunni vel við sig á gamla heimavellinum. Hjá HK var Sigurður Jefferson Guarino afar öflugur á línunni.
Afturelding, Fram, Haukar, ÍR, KA og Stjarnan eru komin í átta liða úrslit. Tvær síðustu viðureignir 16-liða úrslita verða leiknar 9. desember þegar Selfoss fær FH í heimsókn og Valur tekur á móti Gróttu. Leikjunum verður ekki við komið þessa dagana vegna viðureigna FH og Vals í Evrópudeildinni á morgun.
Mörk HK: Sigurður Jefferson Guarino 8, Andri Þór Helgason 5/2, Aron Dagur Pálsson 3, Ágúst Guðmundsson 3, Hjörtur Ingi Halldórsson 2, Haukur Ingi Hauksson 2, Leó Snær Pétursson 1.
Varin skot: Jovan Kukobat 6, 17,6%.
Mörk Aftureldingar: Blær Hinriksson 8, Birgir Steinn Jónsson 6/1, Ihor Kopyshynskyi 4, Stefán Magni Hjartarson 3, Árni Bragi Eyjólfsson 2, Kristján Ottó Hjálmsson 2, Harri Halldórsson 1, Þorvaldur Tryggvason 1, Ævar Smári Gunnarsson 1.
Varin skot: Einar Baldvin Baldvinsson 18/1, 43,9%.
Tölfræði HBStatz.
Poweradebikar karla – fréttasíða.
