Ihor Kopyshynskyi leikmaður bikarmeistara Aftureldingar í handknattleik karla hafnaði í áttunda sæti með löndum sínum í úkraínska landsliðinu á Evrópumótinu í strandhandbolta sem lauk í Nazaré í Portúgal í dag. Úkraínska landsliðið tapaði í hádeginu í dag fyrir Króötum í leiknum um sjöunda sæti mótsins, 2:0 í hrinum talið (26:14, 22:20).
Ihor fór á kostum á mótinu og varð fjórði markahæsti leikmaður mótsins með 119 mörk. Fyrir vikið var hann tilnefndur sem einn þeirra leikmanna sem valið stóð um þegar kosið var í úrvalslið mótsins. Igor hlaut ekki brautargengi kosningunni.
Ungverjar urðu Evrópumeistarar eftir sigur á Þjóðverjum í úrslitaleik. Danir lögðu Portúgala í viðureign um bronsverðlaun. Sextán landslið tóku þátt í mótinu sem hófst snemma í síðustu viku.
Þýska landsliðið varð Evrópumeistari í kvennaflokki. Hollendingar hrepptu silfrið og Spánverjar bronsverðlaun.
