„Það eru nokkur smáatriði sem við viljum bæta og auka um leið enn meira á baráttugleði liðsins,“ sagði Sandra Erlingsdóttir, landsliðskona í handknattleik í samtali við handbolta.is um væntanlega viðureign Íslands og Tyrklands í undankeppni Evrópumótsins í handknattleik. Leikurinn fer fram á Ásvöllum í Hafnarfirði í dag og hefst klukkan 16. Ókeypis aðgangur er á Ásvelli í boði Olís.
Eftir tap fyrir Tyrkjum ytra á miðvikudaginn, 30:29, í leik þar sem Tyrkir voru aðeins einu sinni með yfirhöndina í leiknum þá eru íslensku konurnar ákveðnar í að snúa taflinu við í dag og vera með yfirhöndina frá upphafi til enda. Með sigri halda þær í vonina um vera í möguleika um EM sæti fram í síðustu leiki undankeppninnar sem fram fara síðla í apríl hér heima og í Serbíu.
„Sóknarleikurinn var góður í fyrri viðureigninni við Tyrki ytra á miðvikudaginn. Þess vegna munum við halda óbreyttri áætlun í leiknum í dag nema að við ætlum okkur að keyra enn meira á tyrkneska liðið með hraða okkar en í síðasta leik,“ sagði Sandra ennfremur sem eins og aðrir leikmenn íslenska landsliðsins skora á landsmenn að mæta á Ásvelli klukkan 16 í dag.
„Við höfum líka skerpt á skipulaginu, ekki síst þegar við hlaupum til baka eftir að hafa misst boltann.“
Sandra segir íslenska landsliðið hugsa um einn leik í einu. „Við verðum að klára okkar leik áður en hægt verður að velta framhaldinu fyrir sér og því sem tekur við í tveimur síðustu leikjunum í apríl,“ sagði Sandra Erlingsdóttir í samtali við handbolta.is.
Staðan í 6. riðli undankeppni EM:
Leikirnir sem eftir eru: 6.mars Ísland - Tyrkland 20.apríl: Tyrkland - Serbía. Ísland - Svíþjóð. 23.apríl: Serbía - Ísland. Svíþjóð - Tyrkland.
