Þýska karlalandsliðið í handknattleik verður ekki við setningu Ólympíuleikanna í Tókýó á morgun. Þetta var tilkynnt í morgun áður en liðið ferðaðist til Tókýó frá Tokushima þar sem það hefur dvalið við æfingar og annan undirbúning síðustu vikuna. Axel Kromer íþróttastjóri þýska handknattleikssambandsins og Alfreð Gíslason landsliðsþjálfari eru sagðir hafa tekið þessa ákvörðun.
Þjóðverjar ætla að mæta eins ferskir til leiks og þeir geta á laugardaginn í upphafsleik sínum á leikunum en þá mæta þeir Evrópumeisturum Spánverja.
Setningarhátíð Ólympíuleikana verður með öðrum blæ að þessu sinni. M.a. verða engir áhorfendur á keppnisvellinum en alla jafna hefur verið uppselt á hátíðina á leikunum. Kórónuveiran er að gera mönnum gramt í geði í Tókýó eins og hér heima. Af þeim sökum þykir rétt að takmarka samgang eins og kostur er á.
