Alfreð Gíslason, landsliðsþjálfari Þýskalands í handknattleik, segir ekkert óeðlilegt við að forráðamenn félaga í Þýskalandi hafi sínar skoðanir á vali á landsliðinu hverju sinni. Hins vegar sé sérstakt að landsliðsþjálfarar annarra þjóða gagnrýni valið á þýska landsliðinu. Bob Hanning, framkvæmdastjóri Füchse Berlin og landsliðþjálfari Ítalíu, virðist með böggum hildar vegna þess að Alfreð valdi Rune Damke, hinn reynda hornamann THW Kiel á kostnað Tim Freihöfer leikmanns Füchse Berlin, þegar EM-hópurinn var valinn.
Hannig skrifar reglulega pistla fyrir Kicker veður stundum á súðum og virðist á tíðum eiga erfitt með að greina á milli starfa sinna og skrifa. Þetta er ekki fyrsta sinn sem Alfreð svarar Hanning fullum hálsi.
Frekar óvenjulegt
„Stjórnendur félaganna bera vitanlega hag leikmanna sinna fyrir brotist og vilja veg þeirra sem mestan. En það er frekar óvenjulegt að annar landsliðsþjálfari gagnrýni ákvarðanir annarra þjálfara opinberlega,“ segir Alfreð í viðtali við „Bild am Sonntag“ og Handball-World vitnar til.
Hlaupa ekki í fjölmiðla
„Freihöfer hefur staðið sig vel þegar hann hefur leikið með landsliðnu. Hann hefur hins vegar ekki leikið jafn vel í vetur og í fyrra með félagsliði sínu. Bob Hanning heldur sínum leikmönnum hjá Füchse Berlin hátt á lofti. Ég veit að fleiri stjórnendur félagsins gera það einnig en þeir láta ógert að hlaupa með skoðanir sínar í fjölmiðla,“ segir Alfreð ennfremur og undirstrikaði að það væri sitt mat að reynsla Damke styddi betur við þýska landsliðið eins og málum væri háttað um þessar mundir.
Þýska landsliðið kemur í fyrsta sinn til æfinga í dag.
Alfreð hefur valið EM-hópinn – skildi Freihöfer og Kastening eftir
