Annar sigur í röð

Thea Imani Sturludóttir og samherjar í Århus United unnu í kvöld sinn annan leik í röð í dönsku úrvalsdeildinni í handknattleik er þær lögðu Nyköbing, 23:20, á heimavelli í 12. umferð deildarinnar og þeirri síðustu í bili.

Með sigrinum í kvöld lyfti Árósarliðið sér upp í sjöunda sæti deildarinnar með 13 stig. Staðan var jöfn í hálfleik, 9:9.

Thea Imani skoraði eitt mark en átti tvö skot að markinu. Markvörður Árósarliðsins Martina Thörn, fór hamförum í markinu. Hún varði 17 skot og var með 48,5% hlutfallsmarkvörslu. Reyndar var Louise Egestorp einnig vel á verði í marki Nyköbing, varði 14 skot og var með liðlega 42% hlutfallsmarkvörslu.

Eins og komið hefur fram í fréttum glímir Árósarliðið við mikla fjárhagserfiðleika um þessar mundir. Leitað er í dyrum og dyngjum að peningum inn í reksturinn. Á næstu vikum verður leitin hert. Beri hún ekki árangur getur svo farið að liðið verði lagt niður í árslok.

Önnur úrslit kvöldsins:
Herning-Ikast – Skanderborg 34:18
Randers – Esbjerg 25:33
Köbenhavn – Ajax 25:18
Silkeborg Voel – Horsens 23:24
Viborg – Odense 23:32
Staðan:
Esbjerg 23(13), Odense 22(12), Viborg 22(13), Köbenhavn 18(13), HFN Nyköbing 15(13), Herning-Ikast 15(13), Århus United 13(13), Silkeborg-Voel 12(13), Ajax 9(13), Randers 8(13), Holstebro 8(12), Skanderborg 6(13), Horsens 6(13), Vendsyssel 1(11).

Hlé verður nú gert á keppni í deildinni vegna Evrópumóts kvenna sem hefst 3. desember. Næstu leikir fara fram 29. desember.