Árni Stefán Guðjónsson hefur verið ráðinn þjálfari meistaraflokks kvenna hjá FH til næstu þriggja ára. Hann tekur við starfinu í sumar.
Árni Stefán þekkir hvern krók og kima í Kaplakrika enda rótgróinn FH-ingur. Hann er reyndur þjálfari sem starfað hefur bæði í kvenna- og karlaboltanum undanfarin ár og er í dag annar þjálfara U-19 ára landsliðs kvenna. Síðast þjálfaði Árni Stefán meistaraflokkslið þegar hann stýrði kvennaliði Hauka tímabilið 2019/2020.
Skýr framtíðarsýn
„Það er mikið fagnaðarefni að fá Árna Stefán til starfa á ný til FH, við þekkjum hann vel. Árni Stefán er algjör toppmaður og með mikinn metnað. Framtíðarsýn hans er einnig mjög skýr,“ sagði Ásgeir Jónsson formaður handknattleiksdeildar FH í tilkynningu deildarinnar.
Styrkja hópinn í sumar
„Við erum mjög ánægð með núverandi leikmannahóp, mikil reynsla í bland við ungar og efnilegar stelpur sem eru að stíga sýn fyrstu skref. Við munum bæta við okkur leikmönnum í sumar og styrkja hópinn ennfrekar. Jafnframt er stór hópur stúlkna á leiðinni upp úr yngri flokka starfi okkar og framtíðin því björt hjá FH. Við hlökkum til samstarfsins við Árna Stefán, væntum mikils af honum og horfum björtum augum á næstu tímabil,“ sagði Ásgeir Jónsson ennfremur í fyrrgreindri tilkynningu.
FH er í 5. sæti Grill 66-deildar kvenna.
