Aron Dagur Pálsson og samherjar í sænska úrvalsdeildarliðinu Alingsås eru komnir í sumarleyfi frá kappleikjum í sænsku úrvalsdeildinni í handknattleik. Það átti sér stað eftir að liðið tapaði þriðja sinni fyrir Bjarna Ófeigi Valdimarssyni og félögum í Skövde, 26:21, í fjórðu viðureign liðanna í átta liða úrslitum um sænska meistaratitilinn í dag. Leikið var á heimavelli Alingsås.
Slakur sóknarleikur Alingsås-liðsins í fyrri hálfleik varð liðinu fyrst og síðast að falli. Það skoraði aðeins sjö mörk á fyrstu 30 mínútunum meðan Skövde-menn skoruðu fjórtán sinnum.
Skövde fékk þar með þrjá vinninga í rimmu liðanna en Alingsås einn.
Aron Dagur tók ekki þátt í leiknum í dag vegna meiðsla en hann missti af öllum viðureignunum fjórum af þeim sökum. Hann rær á ný mið fyrir næsta keppistímabil eftir tveggja ára veru hjá Alingsås.
Bjarni Ófeigur átti eitt markskot fyrir Skövde og það geigaði.
