„Þetta er svo sannarlega vonbrigði. Við ætluðum okkur svo sannarlega meira,“ sagði Dagur Arnarsson hinn reyndi leikmaður ÍBV eftir að ÍBV tapaði fyrir Stjörnunni með fimm marka mun í undanúrslitum Poweradebikarsins í handknattleik karla á Ásvöllum í kvöld, 34:29.
„Ég er sérstaklega óánægður með hvernig við kláruðum fyrri hálfleik þegar við misstum Stjörnumenn fram úr okkur. Svo var þetta bara vont hjá okkur í seinni hálfleik, frá a til ö,“ sagði Dagur ennfremur.
Dagur sagði að leikmenn ÍBV hafi allan leikinn haft trú á því sem þeir voru að gera. „Við bara hittum ekki á það að þessu sinni.“
„Við gerðum mörg mistök sem er dýrt í svona leikjum. Þetta eru bara mikil vonbrigði fyrir framan allt þetta fólk sem fylgdi okkur á leikinn. Við vildum gera meira fyrir þetta lið,“ sagði Dagur Arnarsson en Eyjamenn létu sig svo sannarlega ekki vanta á Ásvelli í kvöld.
Lengra viðtal er við Dag í myndskeiðinu hér fyrir ofan.
