Benedikt Emil Aðalsteinsson hefur reynst færeyska úrvalsdeildarliðinu KÍ í Kollafirði happafengur eftir að hann kom til félagsins frá Víkingi í síðasta mánuði. Benedikt Emil átti stórleik í gærkvöld þegar KÍ og Kyndill skildu jöfn í riðlakeppni færeysku bikarkeppninnar, 33:33. Viktor Lekve tók við þjálfun KÍ í sumar.
Benedikt Emil skoraði níu mörk og gaf 10 stoðsendingar í leiknum.
Kyndilsmenn jöfnuðu metin úr vítakasti þegar leiktíminn var úti.
Þrátt fyrir jafnteflið er KÍ komið í undanúrslit bikarkeppninnar. Ein umferð er eftir af riðlakeppninni. Að síðustu umferðinni lokinni, 10. desember, skýrist hvort KÍ fær heimaleik í undanúrslitum en baráttan um heimaleikjaréttinn úr riðli 2 stendur á milli KÍ og Kyndils.
KÍ þarf að vinna með Kyndil 2 í lokaumferðinni með töluverðum mun til þess að hafa sem hagstæðasta markatölu ef aðallið Kyndils vinnur StÍF í síðustu umferð. Takist StÍF að vinna Kyndil eða gera jafntefli, dugir lærisveinum Viktors í KÍ sigur, óháð markatölu, til þess að fá heimaleikjarétt í undanúrslitum.
H71 og Neistin í úrslitaleik
H71 og Neistin eru örugg í undanúrslitum úr hinum riðli bikarkeppninnar og mætast í úrslitaleik um efsta sætið og þar af leiðandi um heimaleikjarétt í undanúrslitum 10. desember.
